Ka Philh Kho Lo
“Ka Philh Kho Lo” ca uk online cung zuarkhawh ding in a tawlreltu Peter Sang cung ah lawmhnak chim ka duh. Laica in tialmi cauk zong online ah cawk khawh an si mi hi a tha tuk hringhran. Hi cauk ka tialnak kum 20 a tling cang. Ka tialmi tuanbia cu kum 32 a rau mi tuanbia a si tik ah kan fanau le ramchung ramleng hna nih rak rel kho ve te hna seh law ti hi ka saduhthah nganbik a si. A tu hnu ah hin tawituk lawng in ka rak tialmi hi kaa ngaichih. Pathian nih can tha a kan pek lai i, kan peh than te lai ti hi ka ruat zungzal ko. A cawtu le a reltu nan cung ah kaa lawm.- Victor Biak Lian
$10.00 $7.00
Description
Biahmaiṭhi
“Hi cauk cu nan vun i lak i vuikhat nan vun rel phum cang hnu ah cun rel dih hlan lo, ngol loin rel duh awk, mi a lem khomi cauk tha ngai a si.” – Pu Lian Uk
Chin miphun le Chinram kong chim le tial tik i philh khawh lo tuk ah kan nolh lengmang theumi kan chan bia cu: Mirang kai hlan chung vialte Chin miphun ram hi aho miphun dang ukmi hmanh si loin kan pipu hna nih hmawngthiam in an rak tlakmi, vawleicung UNO upadi phungning ah Chin miphun nih dah ti lo, mi zei miphun hmanh nih kan ram tiin an i ham khawh lomi, a sunghar ngaimi kan ram a si, ti hi a si. Mirang kai hlan chung chan vialte aa khatmi pipu biaknak phung zulh cio in bawichung le loram ngeimi hna uknak in kanmah khua le tlang cio in kan rak i uk cio hna. Cucaah, siangpahrang pakhat nih uknak phunghram pakhat in miphun khat ram khat a uk bantukin kan pipu biaknak phung nih “Chin” timi chung ah telhmi vialte hi miphun khat ram khat in a rak kan chiahning a langhnak ngai asi.
Mirang nih an uk cangmi India ram le Kawlram karlak tlawnkai khawhnak dingah Chinram pal in lamsialnak nawl an rak hal nain Chinram uktu hna nih an pe hna lo. Cu ruang ah Kawlramlei ralhmai he Indiaramlei ralhmai he ralhmai pahnih karceh in Chinram cu 1888-89 kum thokin Mirang nih an vun chim.
Lai meithal, li le thal, fei le nam hmangin raltha ngai le fak ngai in Mirang cu an rak doh hna i Mirang nih cun fawite in an rak tei hna lo. “Bawichung le loram ngei nih nan i uk tawnning le sining in nan i uk ko lai i Mirang cu ngunkhuai lawng pek kan si lai. Nan hna a tlak ahcun remdaihnak kan tuah lai,” tiah Mirang nih an timi kha Chinram uktu pawl nih an cohlan caah khua kipah remdaihnak an tuah. Cu an hnatlaknak biakam cu Chin Hills Regulation 1896 upadi ah an tial. Lushai, Kuki, Naga, Chin tlang i a ummi Chinmi hna le Chin miphun nunphung le holh a hmangmi paoh Chin miphun chungah an i tel dih tiah cu upadi chungahcun an tial chih. Cu upadi ningin kan pipu hna nih Mirang kha ngunkhuai lawng an rak pek hna i dai tein ram-uk ding zong Mirang nih an rak bawmh hna. Cucaah, Mirang uk chung vialte kan ram kha kanmah biaknak le nunphung ningin kan rak i uk than.
Indiaram nih 1947 kum le Kawlram nih 1948 kum ah independence lak ding an si. Hi lio ahhin Kawlramlei Chinram, Kachinram le Shanram hi Kawlram he fonh in uk loin a dang tein Mirang nih a rak uk hna i cu ram hna cu Burma Frontier Areas (BFA) tiah an rak auh. Anmah ram cio uknak ding ttialmi upadi ning tein a rak uk hna. BFA tiah auhmi ram thum hna nih anmah tein independence an la kho lai tiah Mirang nih a rak hmuh lo pinah peh zulh in Mirang nih uk peng ding zong a si kho ti lo. Cucaah UN nih anmah le ram cio tein an i uk khawh ding cawnpiak pah in UN Trusteeship chung chiah i uk chung ding kha an rak ruah cang.
Kawlmi ram independence laknak ding kong caihhmai dingah Kawlram ai-awh in thlahmi palai hna cu General Aung San hruainak in London an rak tlawng. BFA ram hna hi UN nih mah tein uknak a cawnpiak pah in a rak uk chung kho dingah cun inpedendence a hmu dingmi Kawl cozah hi aa tlak bik tiah ca an rak tial. Cuti si ahcun, BFA ramhruaitu pawl nih an ram hmailei kong zeitindah an ruah i siter an duh timi ruahnak halnak dingah Panglong khua ah i tonnak um seh ti kha Mirang cozah le Aung San nih hnatlaknak an rak tuah.
Kawl he independence nan lak ti ahcun UN Trusteeship i nan um bantukin mah tein i uk khawhnak phung a simi ‘federal’ phunghram kan tuah lai i nanmah tein nan i uk kho lai; cun, kan duh lo nan ti zongah nan chuak than kho ko tiah Aung San nih a rak lem hna. BFA ram hruaitu hna nih an zumh caah Panglong hnatlaknak minsen an thut i ‘Union of Burma’ (Pyihtaung suu Myanmar naingan) timi ramthar cu BFA ram le Kawlmi ram fonhtonh in dirh a rak si. 1947 uknak phunghram zong ah ramkulh pawl chuah a duhmi chuah khawh ding upadi an tial chihmi khi General Aung San kamhmi bia cu a si.
General Aung San a thih hnu 1947 Kawlram uknak phunghram ah Kawlmi hruaitu nih BFA ram cu Kawl ukmi ram ah an ser dihmi kha BFA nih an duh lo. Cu ruangah Kawlram uknak phunghrampi kha federal uknak phunghram in tial dingah 1962 kum ah an rak khin i U Nu hruaimi cozah nih caih dingin an rak ruah. A sullam cu BFA ram nih anmah tein uknak i tlaih ding an duhmi kong vialte kha anmah ramkulh cio tein i serh, i tialmi phungram in i uk i Kawlmi nih anmah ram ah an duhning tein anmah ramkulh chung kong kha anmah tein i uk ve kha a si. Ram komh bupi cozah i hrawm ko bu i BFA ram nih anmah phunghram tein i uk i Kawlmi nih nawl va ngeih khawh ti lo ding kha General Ne Win thok in Kawl ralkap cozah nih an ruat kho lo. BFA ram kong he pehtlai in Kawlmi nih nawl va ngeih hnawh rih i Kawlmi kut tangah chiah ding lawng kha an duh peng.
‘Federal’ uknak cu ram bupi i thenthek dihnak a si tiah General New Win thok in Kawl ralkap cozah nih lih tawn in mipi kha a hlen hna i a ralkap bu he cozah a kai liomi Prime Minister U Nu le vuanci pawl vialte cu zantim ah an inn cio ah an luh hnawh hna i hriamnam hmuah chih in an tlaih hna, thong an rak thlak dih hna i, ram pumpi uknak nawl kha Ne Win nih chuh dih hram a thok. Ram pumpi kha party pakhat lawng nih a ningpi in uk khawhnak dingah 1974 kum rampak uknak phunghram kha khongton in a vun ser.
1988 kum ah mipi nih cu uknak phunghram an duh lonak cu lam zawh in an rak aupi. Cu tikah zung chungah cozah riantuantu an um ti lo caah uknak a rawk i a kal kho ti lo. Doh-au hruaitu pawl nih khuachung mi cozah an dirh khawh hlanah General Saw Maung nih ram uknak nawl a lak. Zungrian ah lut than dih u law, democracy phungtling ning in thimnak kan tuahpiak hna lai i mipi nih thimmi cozah sinah ram uknak nawl ka ap lai tiah doh-au hruaitu pawl kha bia a kamh hna i 1974 uknak phunghrampi cu a hrawh. Cu tikah, mipi cu zungah rian an lut than i thimnak an tuah tikah Daw Aung San Suu Kyi hruaimi NLD (National League for Democracy) party nih 1990 kum thimnak cu a tei. General Saw Maung nih thimnak ah a teitu party nawl pek a timhmi kha General Than Shwe le a zultu nih an rak duh lo. Cucaah, ralkap bawi tanhtu dang a ngeih lo caah General Saw Maung cu a rian in an chuah i General Than Shwe nih uknak nawl cu a lak. Cucaah 2008 kum tuahmi uknak phunghram cu BFA ram pawl miphun le an ram hlohnak ding program ah sermi rampak uknak phunghram si dingin lih in mipi 92% nih an duhmi a si tiah hman dingin a fehter.
Kawl miphun nih anmah Kawlmi ramkulh chungah anmah tein nawl an i ngeih bantukin BFA ram pawl zong nih an ram chung cio kong he ai pehtlaimi ah anmah tein nawl an ngeih khawhnak hnga le, Kawlmi ram he BFA ram he kan zapi kan i hrawm khawhmi uknak hmun lawngah ramkulh kip cio in MP aa zat in thlahmi a umnak komhmi ram bupi cozah ser ti i America ram uknak phunghram bantukin federal uknak phunghram ser khawhnak ding cu BFA ram vialte le democracy a tanhmi Kawlmi vialte nih kan canghvaihmi hi a si.
Cu canghvaihnak ah ramleng in Chin miphun nih Chin National Front (CNF) le Zomi National Congress (ZNC) le a dang Chinmi bu komh dih in dirhmi Chin National Council (CNC), Chin Human Rights Organization (CHRO) le Chin Forum Managing Board (CFMB) tiin riantuannak hma kan lak ti hna. Cu rianttuannak chung ah an nunnak thap in thih ri nun ri in hriamnam a tlai cuahmahmi CNF/CNA hna dah ti lo ah cun a cawlcang bik le a re a thei bikin ka hmuhmi hna cu Pu Victor Biak Lian, Pu Bawi Lian Mang, Pu Sui Khar, Pu Lian Hmung Sakhong le Pu Andrew Ngun Cung Lian hi an si. Anmah hi riantuan ah tei a rial bik an si lawng hmanh si loin thli cung vanlawng ah khua a sami khan in hmuhmi an si. Cu chung ah a cunglei kan tialmi riantuannak pathum Chin National Council (CNC), Chin Human Rights Organization (CHRO) le Chin Forum Management Board (CFMB) ahhin Ethnic Nationalities Council (ENC) zong ah aa tel dih khomi cu Pu Victor Biak Lian hi a si. Cu ruang ah a khualtlawn, a umkal a tamning hrimhrim kha hi cauk chungah fiang tein nan relmi a si.
Pu Victor Biak Lian, Pu Bawi Lian Mang le Pu Sui Khar hi 1992 kum hrawngah mino tete Mirang holh zong a thiam rih lomi an rak si i keimah mit toi hmai toi ah an riantuannak le an thiamnak a kai thluahmah i anmah tein aa sersiammi an si. Teimak le tuan ah cun aho zong nih kan tluk lomi hna an si tiin ka hmuh. A cunglei kan riantuannak hmun CNC, CHRO le a bikin CFMB ahhin Chin ramkulh chung ka kip in Chinmi kan sawm dih hna i an i tel len ko nain mah pumpak rian tlolh in retheih sifah kha an zenh caah a kan chuah takmi zong an um len. An zawt a zual khomi an si bu zongah a caan hman te din awk si i ken pah in meeting le i tonnak ding bia pek ciami hmun ah tlolhlo dingin umkal aa zuam zungzalmi an si. Hi bantuk caan ah kan rak tuanpi hawii tleicia Pu John Mangtling Cinzah, Pu Mang Bur, Pu Vumson Suantak hna kha kan hlam ngai hna.
Hika ah a min ka tial lomi kan hawi pakhat cu zarhkhat ah vui hnih thum si-inn ah thi tawl a haumi a si nain khual a tlawng i meting a kai ko rih. Vuikhat cu lampi ah mawtaw tamtuk nih lam an kham ruangah a thi tawl caan tanh in sizung kan phan kho ti lo i sau ngaite a kuah. An retheihning, manh caan an ngeih loning, tuk sum thih khawhnak hmun an tonmi in Pathian nih a khamhning le a si taktakmi a dikmi hmuhtonmi kong kha hi cauk ah Pu Victor Biak Lian (Par Tha pa) nih a tial. Khua kan phanh meting kai tikah cun a dam lomi, a re thei lomi bang vaibar lo cha tein tha nuam ngai in bia an chim khawh khi mipi nih thapeknak le conglawmhnak nan ngeihmi ruangah a si ko.
Hi cauk chungah rethei thabat in thih ri nun ri in a tuan ciomi vialte kong a tialmi hi tilian nih a fenh cuahmah mi Chinram le Chin miphun chanhchuah ding namchan khuahrawh in tuanmi kong a si. A bitkauh tung vang karh meng 14,000 chung kan i karh khumh cangmi kan ram chung ah Chin miphun lawngte ti cawh lo in Chin miphun holh le nunphung lawngte a len khawhnak atu kanram hi dah ti ko lo, khoika vawlei hmunhma dang hmanh ah Chinmi holh le nunphung lawngte a len khawhnak ding ram humhak khawhmi kan ngei ti lo. Cucaah kan i karkhumh cangmi, kan i ngeih chunmi kan Lai miphun vawlei le ram hi kan nunnak hrim pek in khamh awk le hun choter awk ah kan tuan cuahmahnak kong cu hi cauk nihhin a langhter.
Pu Lian Uk Washington DC 2 April 2011
Additional information
Author | |
---|---|
Format | |
Pages | 172 |
Year Published | |
Language | |
ISBN | 978-616-90908-0-9 |
You must be logged in to post a review.
Related products
-
Featured
$10.00$7.00 -
Featured
$6.00$4.00 -
-
Category
- Arts (2)
- Biography (5)
- Ebook (26)
- Family (1)
- Fiction (3)
- Free download (61)
- History (28)
- Journal (1)
- Magazine (1)
- Philosophy (4)
- Politics (36)
- Psychology (1)
- Religion (12)
- Reports (17)
- Thesis & Dissertations (35)
Reviews
There are no reviews yet.