Tang 2 Lai Carel [2024]

Theihternak

Hi Lai Carel ukpi hi Hakha, Thantlang, Zophei, Lautu, le Mara sianginn bupi hna rianṭuanṭinak a si mi Lai Carel Le Ukpi (Local Curriculum and Textbook) Committee nih tang 1 in tang 9 tiang cawn ding ah a chuah mi a si. Cawnnak ah hman mi ca hi cazual, journal, mekazin, cauk, le internet ah a chuakcia mi chung in laak mi zong an um. Cun, Myanmar ram cozah fimcawnnak zungpi chuah mi ukpi chung Kawl in Lai ah a remnak in leh mi zong an i tel.

Hi Lai Carel ukpi a chuah khawh nakding ah siangngakchia zong nih phaisa an thawh; siangcachim le sianguk nih cawn ding kong a tlangpi an chuahpi; cucu i chirhchan in Lai Carel Le Ukpi Committee nih cawn ding ca an ṭial, an khawmh, an remh i ukpi ah an ser. Cun Thantlang Placement Affairs Committee nih ruahnak pek in siseh, a tawlrelnak phaisa hawlpi in siseh a bawmh ve hna. Zapi thazaang in a chuak mi a si; zapi fimcawnnak ca ah cun aho poh nih man lo in i hman khawh cio a si; pumpak chawlehnak ca bel ah hman lo ding a si lai.

Thantlang Peng Sianginn Bupi (Thantlang Township Education Board) tiah Myanmar rambuai kum 2021 ralthawh hnu in Interim Lautu Region Education Board, Interim Maraland Education Committee, Thantlang Education Department, le Zophei Education Board sianginn bupi pali rianṭuanṭinak dirh a si. Anmah pin ah Hakha Township Education Board sawmchih in sianginn cawn awk ca kongkau tawlrel ding ah Local Curriculum Team cu kum 2022 ah ser a si i, rian a bawmtu ah Thantlang Placement Affairs Committee thiah a si. Kum 2023 in Local Curriculum Team cu Local Curriculum & Textbook Committee tiah a min thlen a si.