Japan Ralkap Hna Nih Chim Mi Tuanbia Kong

Hi cauk cu Japan miphun a si mi Dr. Kazuo Tamaya le Mirang miphun a si mi John Nunneley nih WWII lio ah Japan ralkap nih Burma le India ram chung raltuknak i Japan ralkap hmuhton mi kong ‘Tales By The Japanese Soldiers’ ti min bunh in an ṭial mi cauk chung ta ka leh chin mi a si.

Japan ralkap cheukhat cu China ram raltuknak zong ah aa tel cang mi an um hna i, Japan ram in a hei i thawh mi hna he Burma ram chung Yakhine le Chin ram in India ram Manipur le Naga ram tiang an raltuknak i an hmuhton mi le, cu raltuknak an sungh hnu in Burma ram chung lei an hei kiar ṭhan i Thai ramri an phanh tiang lampi i an i kahdonak le harnak phuntling an tonnak kong a dotdot tein ṭial mi an si. Cu raltuknak i aa tel mi hna le an kong an ṭial mi hna chung ah a tam deuh cu ralkap ṭuan thar in ralbawi no Captain tiang le sii sayama pawl i an hmuhton mi kong laak ṭial mi an si hna.

Hi chung ah Mirang ralkap pa an tlaih mi nih kuak a hawt tuk ah Japan ralkap pa cigarette a halnak kong. Zan raltuknak ah meithal paar ah bayonet naam zum bunh in ral an nam hna nak kong. Ralkap bu cheukhat cu rawl ei awk an ngei ti lo i ramlak bahra an kawlnak kong. Hliamhma an put ah an hma menhnak lachon le bandage puan a um ti lo i banhla hnah an hmannak kong. An i kahdonak ah a ralkap hawile a thi mi an tam tuk cang i thaizing cu ka thi ve ko lai tiah inn lei i a nu kong hun ruat in kahcham chung ah an mitthli a tlaaknak kong le rawl ei awk le kuan an ngei ti lo i Mirang ralkap an kah mi hna meithal kuan le ration rawl laak le hmang in ral an dohnak kong. Ral tank hei kal hnawh in a chin chung ah grenade bomb an hei cheh hna nak kong. Vanlawng le vanlawng an i kahdonak. Imphal le Kohima raldonak ah battalion pakhat chung in ralkap cheu nga ah cheu khat 20% lawng an taannak kong. Sii Sayama tete nih ral kut cung phanh lai le ral i tlaihter lai duh lo ruang ah mahte i thah timh in le grenade bomb i puahter tu an duh deuhnak kong le Kawl ralkap nih an dawi an kahnak hna kong. A hawi ralkap mizaw cu nungdam seh ti duh ah a hngawng ah hri in a ṭem i lam a kalter, funghreu in a tuk pahnak kong. Ral sungh hnu i hnulei an i thawn lio ah an hawile mizaw hmapu laang in a phortu tu hna tiang zong in rawl ei awk ngeih ti lo le thader tuk ruang ah an thih dih ve nak kong. Khat telei ah Mirang ralkap hmapu le an tlaih i a thi mi hna kong.

A donghnak ah cun pakhat le pakhat zong i siaherh kho ti lo le i hraam kho ti hna lo in le mah le nunnak cio kawl in an kalnak lampi ah ṭaamhal zawtfah tuarhar in le hliamhma an put mi in ralkap tampi an thihlohnak kong a hmutu nih ngaihchiat lungfah tuk ah ‘Pathian Nih A Hlawt Mi Hna’ ti tiang in cu lio an tuarin fah tukning muiṭial langhter mi he a ṭial mi kong tehna rel awk tampi a um.

Cu bantuk in hi an raltuknak tuanbia chung ah Japan miphun le ralkap hna i an lungput, an ralṭhatnak, rian pakhat an i khinh mi cung ah lungfek te le i biatak in ṭuan le tlamtlinter khawh a duh mi miphun an sinak zong hmuh khawh an si.

Cung Bik Ling